Menut de navigacion

Ajuda

Benvenguda, benvengut sus BaRuLa ! Trobaràs aquí tot çò que fau per aprener a te servir de l’utís, coma simple passaire tant coma contributor se per cas zo voles venir, estapa per estapa. Se ses familiarizat emb lo brave monde de l’internet, tot ‘quò-qui te serà d’una utilitat relativa, mas se quo es pas lo cas, te laissarem pas sus lo costat dau chamin, segur ! Tòrna aquí s’as de las interrogacions, de las questions sus lo foncionament, daus dobtes, deuriás trobar una responsa sens quitament aver besonh de zo damandar !

Se servir de BaRuLa

Vuda generala dau site

La pagina d’acuelh dau site (http://barula.de) es l’interfàcia principala dau site. Aquí, auràs acces a un fons de mapa sus lo quau de las fichas son espingladas, emb un sistema d’icònas destriadas per categoria. Quora arribas, la darriera ficha rentrada s’aficha dins un cadre a gaucha, mas as la possibilitat de sautar d’una ficha a una autra emb las fleschas qu’apareissen sus son costat. Podes tanben passejar ta soris d’ordinator sus la mapa, en far daus glissats/pausats, daus zooms (emb la roleta o las comandas + e sus lo costat) coma sus una Google Map tradicionala.

Per anar mai luenh, un module de chercha es a dispausicion debàs, sufís de seleccionar los criteris per filtrar la rechercha. En picar « Filtrar », BaRuLa aficharà nonmas las fichas concernidas sus la mapa. Per n’aver una lista ordonada, fau picar sus « Bancuolar en lista » a drecha.

Se picas sus « Dubrir la ficha » en bas de la ficha espinglada, BaRuLa dubrirà còp-sec la ficha completa, emb totas las informacions sus l’endrech.

S'inscriure

Sus BaRuLa auràs besonh de t’inscriure per escriure, publicar, modificar una ficha o nonmàs per comentar las fichas daus autres barrutlaires. Per aquò far, deves anar sus la pagina Participar. Tot t’i es explicat !

Charta

BaRuLa dona una granda libertat a sos utilizators. Çai que lai, quauquas pitas reglas son de respectar :

-Las fòtos charjadas sus lo site deven esser la proprietat de la persona que las charja o ben tot deu aver l’acòrd explicite de lur proprietari. S’agís pas de copiar las fòtos de Google Images, mas de partatjar dau contengut personau !

-Se i a de las personas visiblas sus las fòtos, deven pas esser reconeissablas, per de las rasons de respect de la privacitat e de l’imatge, notadament per los minors. BaRuLa es pas Big Brother !

-Chasque autor es tengut per responsable de çò que publia. Los perpaus que van contra çò qu’es permes per la lei (lo negacionisme e lo revisionisme, d’exemple), seràn pas acceptats.

-L’escritura d’una ficha deu esser desinteressada, e se pòt pas far de la publicitat.

Dins tots los cas, s’una de ‘quelas reglas es pas respectada, los editors e l’administrator an lo poder e la possibilitat d’editar lo contengut o de prener d’autras mesuras.

Lo Tablèu de Bòrd

Vuda generala dau Tableu de Bòrd

Tanleu que ses marcat sus BaRuLa, auràs acces a una interfàcia d’administracion. Dempuei ela, podràs escriure de las novelas fichas (o modifiar las existentas), o ben tot alimentar ton perfiu. Tanben, auràs acces a un espaci comun ente chascun pòt laissar una nòta per los autres, coma un « post-it » a laissar sus un frigò virtuau. Podes a tot moment tornar au Tablèu de Bòrd en passar per la barra que s’aficharà tot en naut, mas nonmàs se ses connectat.

Escriure una nòta

Quo es possible simplament de laissar una nòta « post-it » sus la pagina d’acuelh dau Tablèu De Bòrd. Mai qu’aquò : n’en podes escriure a destinacion de tot lo monde, o nonmàs per tu, en chamnhar sus l’icòna adaptada dins la barra en bas de la nòta. D’autras opcions son disponiblas, coma chamnhar la color de fons (utiliza dau roge se quo es tot plen important !), far una lista coma una lista de chausas a far que podes tanben cochar tanleu efectuadas.

Atencion de pas esfaciar o modifiar en prefondor las nòtas daus autres ! Se jamai trobas que ton escranh es tròp confle, podes totjorn chausir de que afichar o pas dins « Opcions de l’ecran » en naut a drecha o bujar las fenestras emb un simple glissar/pausar. Los chamnhaments aquí efectuats seràn valides nonmàs per tu.

Lo webmestre e sos editors esperen tas suggestions a quel endrech, seràn tratadas a mesura !

Las fichas

Vuda d'ensemble de las fichas

L’architectura de BaRuLa es basada sus un sistema de fichas. A chasca ficha correspon un luòc, un marcaire, de las fòtos e de las informacions textualas. Quo es coma un article de blog, mas emb de las fonccionalitats de mai, e en mai interactiu. Coma vesitaire dau site, podes veire las espinglas que corresponden a las fichas en pagina d’acuelh e l’i cherchar quauquarren en particular emb l’utís a disposicion. Una pagina dedicada te permet de veire una lista de totas las fichas, emb una fòto e un extrach, de la mai recenta a la mai anciana. Se ses connectat, podes aver una vuda mai linda de las fichas dins Tablèu de Bòrd > Fichas > Totas las fichas. Se voles n’en modifiar una qu’escrigueres, quo es tanben aquí que faudrà anar.

Apondre una novela ficha

As visitat darrierament un endrech e zo voles partatjar ? I a mai d’un mejan per apondre una novela ficha sus BaRuLa, mas dins tots los cas te faudrà connectar ! Un còp fach, tròba l’icòna + Novèl en naut o vai dins lo Tablèu de Bòrd > Fichas > Apondre. Un còp davant l’editor, veiqui las etapas per publiar una novela ficha :

  • Botar un titre. Basicament, lo nom de l’endrech sus lo quau fas la ficha.
  • Escriure dau contengut dins la fenestra. As daus utís a disposicion, coma dins un editor de texte tipe Word.
  • Apondre de las fòtos. Las podes botar ente voles dins ton contengut redijat. Pica sus « Apondre un medià ». Un fum d’opcions se presenten, consulta la partida dediada per n’en saubre mai.
  • Localizar l’endrech. Sufís de prener lo marcaire de la pita mapa a la man e de lo botar a l’endrech vòugut. Quo es possible de zoomar mai finament. Un còp plaçat, pica sus « Trobar l’adreiça » per marcar automaticament l’adreiça exacta dau luòc. Figurarà sus la ficha detalhada. Podes tanben far lo contrari e rentrar una adreiça a la man puei picar sus « Trobar las valors de longituda e latituda », ‘quò desplaçarà lo marcaire au bon endrech. Podes tanben far un boiradis daus dos.
  • Rentrar una descripcion. Quo es pas una obligacion, mas as la possibilitat en quauques mots de precisar un pauc mai la natura de l’endrech visitat dins lo champ apropriat, se per cas son sol nom parla pas pro. Exemples : « Egleisa romana », « Usina siderurgica »… Aquò serà afichat en dejos dau titre pertot sus lo site.
  • Donar una nòta. Ton evaluacion personala de l’endrech, segon l’interes qu’i as trobat. Podes laissar voide. La nòta afichada serà una mejana entre la teuna e aquela donada dins los vejaires daus autres barrutlaires sus lo luòc, se n’i a.
  • Chausir una icòna de mapa. Aquò serà l’icòna qu’apareitrà au public sus la pagina d’acuelh generala per ta ficha. A un ròtle estetic tant coma informacionau, vist que definís un pauc lo tipe d’endrech. En cas de dobte, te podes referar a la pagina Legenda. Se jamai p’una de las icònas proposadas correspon, laissa voide e escriu-me una nòta, farai l’icòna adaptada. Nòta que plan sovent l’icòna correspondrà au tipe de ficha.
  • Definir lo tipe de ficha, e donc d’endrech visitat. Sufís de chausir dins çò qu’es perpausat dins la colona de drecha. Podes tanben chausir mai d’un tipe en mantener la tocha « Ctrl » apueiada dau temps que picas sus los autres descriptors que t’interessen.
  • Definir la region. Quò-qui quò permetrà apres de destriar las fichas dins las recherchas segon grandas regions culturalò-istoricas. Te fau chausir dins la lista. Se la region de la ficha l’i es pas o se sabes pas, laissa sens res.
  • Botar un imatge a la una. L’Imatge de Una a una vocacion estetica, vist que rapelarà la ficha pertot sus lo site. L’i podes tornar botar un daus imatges dau còrps de l’article, o un noveu especiau per l’ocasion. Quo es mai que conselhat de charjar quauquarren aquí, si que non BaRuLa botarà un imatge predefinit, per desfaus un aparelh fòto a las colors dau site que vendrà te rapelar que AS PAS BOTAT DE FÒTO ! 😉
  • Picar sus « Publicar » o « Sometre a relectura » (quò depen de ton ròtle coma contributor) e quo es partit !

Opcions de publicacion

Dins lo cadre dedicat en naut a drecha de l’interfàcia de redaccion d’una ficha, quauquas opcions son perpausadas, mas totas seràn pas accessibles per tot lo monde, quo es normau :

  • Enregistrar borrolhon. Se lo contengut es un pauc long a escriure, ‘quò còsta res d’enregistrar pro sovent. En enregistrar entau, res serà publicat mas la ficha serà tot parier sauvada.
  • Apercebut. Coma lo nom z’indica, quò permet de veire de que semblarà la ficha un còp botada en linha per lo public. Deu esser enregistrada coma borrolhon o publiada per veire coma fau.
  • Estat (Editors & Autors). Quò se pòt chamnhar l’estat de publicacion de la ficha, per la passar per exemple en « espera de relectura », se voles la far verifiar per quauqu’un mai.
  • Visibilitat (Editors & Autors). Per desfaus, totas las fichas son visiblas per lo public. Mas se per una rason o una autra zo voles pas, la podes passar en « Privat ». Seràs lo sol (emb los editors) a poder zo veire.
  • Data de parucion (Editors & Autors). Per desfaus, la data de parucion d’una ficha (apareitrà au public) serà lo moment ente as apueiat sus « Publiar » lo prumier còp. Mas podes chausir de pre-datar (per, per exemple, marcar au mai pres de la data de vesita dau luòc de la ficha) o quitament planificar la publicacion d’una ficha (apareitrà pas avant la data marcada).
  • Publicar/Josmetre a relectura/Publicar/Planificar. Segon çò qu’as definit avant, lo boton de validacion chamnharà.
  • Desplaçar dins l’escobilhièr. Se ‘quò te vai pas, podes a tot moment botar ta ficha a la bordilha. Serà pas suprimada, nonmàs en espera de supression.

Modifiar una ficha

Chasque autor a la possibilitat de modifiar sas fichas. Per ‘quò, fau ‘nar dins Tablèu de Bòrd > Fichas > Totas las fichas. Aquí, dos mòdes d’edicion son perpausats dejós chasca ficha : lo rapide (« Modificacion rapida ») e lo complet (« Editar »). Lo complet permetrà de bancuolar en mòde d’escritura de redaccion, mas lo rapide permetrà nonmàs de chamnhar quauquas metà-donadas (lo titre, lo tipe, lo luòc…).

Las opcions de redaccion

Vuda d'ensemble de la barra d'utis per la redaccion

En mòde redaccion, auràs a ta disposicion una colleccion d’utís coma sus un editor de texte. L’i trobaràs, dins l’òrdre :

  • BPer botar en gras.
  • IPer botar en italica.
  • UPer soslinhar.
  • QuotePer marcar una citacion.
  • AlinhamentAlinhar a gaucha/centre/drecha/justificar.
  • CaracteresPer far un caractère especiau (las letras accentuadas de l’occitan notadament).
  • LiamePer botar/enlevar un liame.
  • LinhaPer botar una linha de separacion.
  • TableuPer crear un tableu.
  • ChercharPer cherchar e remplaçar daus mots dins lo contengut.
  • AnullarPer anullar/restablir.
  • DesveloparPer drubir/barrar la segonda barra.
  • InfobullaPer apondre una infòbulla.
  • ParagrafPer metre en fòrma un paragrafe (far daus títols de partida per exemple).
  • ColorChamnhar la color dau texte.
  • ListapiusesFar una lista a piuses, coma ‘quela-qui.
  • ListaordenadaFar una lista ordenada (numerotada).
  • RaiatRaiar dau texte.
  • IndentacionAumentar/diminuar lo retrach dau texte.
  • CoparCopar/Copiar dau texte.
  • PegarPegar dau texte d’un editor externe (Word o autre) sens gardar sa mesa en fòrma.
  • NetiarNetiar tot lo formatatge dau texte seleccionat.

Coma per tot sus BaRuLa, se te manca un utís se podrà apondre, sus simpla damanda. Los que l’i son acostumats pòden tanben dintrar dins lo còde brut, en picar sus lo boton « Tèxte » en naut a drecha de la fenestra. Mas fau coneisser !

Las infòbullas

BaRuLa perpausa, un sistema de comentaris internes au contengut redaccionau. Un autor de ficha pòt entau exprimar sas ideias, anecdòtas, jutjaments, sens jamai subrecharjar son texte. Pòt tanben entau balhar quauquas precisions. Quel utís pren la fòrma d’una infòbulla, donc una bulla qu’apareis nonmàs quand l’utilizator passar la soris a un endrech dau texte. Per n’en far una, fau picar sus l’icòna infòbulla Infobulla, una mena de còde apareitrà alara dins lo texte. Pas de panica ! Fau juste modificar los dos faus-texte que comencen per « Quò-qui » sens tochar lo reste. Lo prumier texte entre crochiets serà lo de la bulla, l’autre lo que la farà apareisser quora la soris passarà dessus. Quo es tanben possible de botar de la color, veire daus imatges, dins ‘quela infòbulla.

Los medias

La Bibliotèca

Chasque contributor de BaRuLa se vei donar d’ofici un espaci virtuau d’estocatge de medias, la Bibliotèca. Quela-qui es accessibla pendent l’escritura d’una ficha, en picar lo boton « Apondre un mèdia ». Segon çò que voles far, podes charjar un o mai d’un fichier a l’encòp. Atencion, un fichier charjat serà pas forçadament integrat a la ficha que ses a escriure, zo fau especifiar. Atencion tanben, quitament se i a pas de limita de talha te fau sovenir qu’un fichier tròp pesuc botarà mai de temps a s’afichar chas quauqu’un qu’a pas una conneccion tròp potenta. Enfin, quitament se ton espaci t’es personau, es accessible per los editors e administrators dau site. Quilhs-qui se reserven lo drech d’esfaçar los medias que serián pas en acòrd emb lo contengut e los objectius dau site. Entau, devetz esser proprietari d’una fòto per la charjar sus BaRuLa !

Detalhs dau media

Quora integras un noveu media, una paleta de parametres se pòden modifiar, media per media, donc fòto per fòto. Los veiqui :

  • Lo títol.
  • La legenda. Apareitrà jos la fòto dins un cadre especiau.
  • Lo tèxte alternatiu. Se la fòto se charja pas, queu texte apareitrà a la plaça. Se sabes pas que botar, fai copiar-pegar dau titol.
  • La descripcion. Coma son nom z’indica.
  • L’alinhament. Se chausisses un alinhament per ta fòto, lo texte vendrà se botar a l’entorn, dins lo demai de l’espaci disponible. Sens alinhament, lo texte apareitrà apres.
  • Adreça de destinacion. Podes liar ta fòto a una autra ressorça, mas desconselham de tochar aqueu parametre. Entau lo monde que piquen sus la fòto la veiràn en mai grand directament.
  • La talha. 3 o 4 possibilitats son ofertas, segon la talha de la fòto originala.

Modifiar un imatge

BaRuLa e WordPress ofren quauques utís per de las modificacions daus imatges. Un còp picat sus l’invita « Modificar l’imatge » veiràs la paleta d’utís per virar, inversar, talhar o recadrar l’imatge.

Crear una galariá

Quo es possible de crear una galariá de fòtos, quora n’as mai d’una a montrar. L’afichatge serà entau optimizat. Per aquò, dins « Apondre un mèdia », vai dins « Crear una galariá ». Tos medias te son perpausats, mai n’en podes mandar d’autres. Pica sus los que voles integrar a a ta galariá, puei sus lo boton en bas a drecha « Crear una galariá ». Aquí, d’autras opcions te son perpausadas :

  • Ligar a. As pas besonh de zo tochar, de tota faiçon picar sus una fòto de la galariá las farà apareisser jos la forma d’un caroseu d’imatges en plen escran.
  • Òrdre aleatòri. Còcha la casa s’as pas de preferencia dins l’òrdre d’afichatge de las fòtos.
  • Talha. 4 talhas son perpausadas per las fòtos de la galariá.
  • Tipe. 3 possibilitats son configuradas : l’efiech grasilha de Polaroids carrats (per desfaus), l’efiech mosaica (una nivolada de fòtos), o ben tot en diapositivas (redondas dins un cadre carrat negre). Sent-te liure d’eissaiar !

Botar un imatge d'un autre site

Quò es possible d’integrar un media vengut d’alhors sus internet, per aquò vai dins « Apondre un mèdia » puei « Inserir a partir d’una adreça web ». Pensa a respectar lo drech d’autor !

Los contributors

Los diferents niveus

Quauqu’un que se marca sus BaRuLa deven còp-sec « Contributor ». Pòt utilizar lo Tablèu de Bòrd e sas foncionalitats e començar d’escriure sas prumieras fichas. Per contra, las pòt pas publiar directament, nonmas las josmetre a relectura.

Apres quauquas fichas publiadas sens problemes, l’administrator fai dau contributor un « Autor ». Entau, pòt contunhar de far de las fichas, mas aurà pus besonh d’esperar una validacion per las publiar.

Se jamai as dau temps e l’envia, podes damandar a esser « Editor ». A queu pòste, podràs escriure, publiar, mas tanben modifiar e corregir totas las fichas, e tanben moderar los comentaris. Per postular, sufís de mandar un mail vià lo formulari de contacte.

Opcions de personalizacion

Editar ton perfiu

Dins ta pagina de perfiu, accessibla dempuei lo menut de gaucha o en picar sus ton nom dins la barra en naut, podes chamnhar de las opcions, coma :

  • Lo nom jos lo quau apareisses publicament.
  • Ton adreiça email (apareis pas publicament).
  • Tos contactes sus los diferents fialats sociaus.
  • Una descripcion biografica de ta persona.
  • Ton avatar.

Tots quilhs elements son benvenguts per animar e personnalizar lo contengut que farjaràs sus BaRuLa. De fach, tot ‘quò-qui serà afichat dins ta pagina d’autor personala, au-dessus de las fichas qu’auràs creadas, mais sus lo costat, pendent la consultacion d’una ficha qu’as escricha.

Chamnhar las colors de l'interfàcia

Per chamnhar las colors de l’interfàcia, deves anar dins ta pagina de perfiu. En naut dau menut de las opcions, veiràs daus temas pre-fabricats. Auràs nonmàs de chausir lo que voles en picar dessus. Podes quitament n’aver un apercebut en directe. Ai atribuat per defaut lo tema « Aubergina », mas i a tanben « Cafè », « Bòrd de mar »… Enfin, enregistra lo chamnhament en bas de la pagina.

Chamnhar son avatar

L’avatar representa chasque utilizator de BaRuLa, que sia autor, contributor o nonmàs comentator. Per defaut, una avatar en forma de mapa es atribuat a tot lo monde, mas chascun es liure de zo chamnhar per mai de personnalizacion. Per ‘quò far, fau esser enregistrat, aver un compte donc, e anar sus sa pagina de perfil. Tot en bas, un formulari de charjament de fichier permet de mandar una fòto o un imatge present sus son ordinator. Una vuda rapida n’es disponibla. Un còp tot enregistrat, lo noveu avatar apareitrà pertot sus lo site.

Comentar

Donar son vejaire

Per comentar, autrament dich donar son vejaire, sus BaRuLa se fau marcar. Un còp marcat e connectat, sufís d’anar en bas de la ficha que voles comentar e l’i escriure çò que voles. Sus BaRuLa as tanben la possibilitat de botar una nòta (en nombre de còrs) a una ficha. L’i notas pas la ficha mas l’interes de l’endrech descrich. Un còp preste, manda lo comentari emb lo boton debàs. Se quauqu’un te respon, zo sauràs per mail automaticament.

Mencionar quauqu'un dins los comentaris

Quo es possible, quora comentas una ficha, de mencionar l’autor d’un comentari precedent, çò que permet de li mandar un mail automatic per li dire que l’as sonat, e donc de fialar la discussion. Per zo far, res de mai simple : fau botar un « @ » puei començar de picar lo nom o lo chafre de l’autre barrutlaire. De las suggestions son balhadas automaticament còp-sec, de tota faiçon. Coma sus Twitter e autres !

Botar una fòto en comentari

Quo es tot a fet possible, sus BaRuLa, de charjar una fòto per la botar en comentari, emb dau texte en mai o non. Se voles per exemple far veire una fòto qu’as presa tu sus la ficha d’un autre, te fau tot simplament picar sus lo boton jos l’airau de texte de comentari, puei la chausir dins ton ordinator. ‘La serà charjada e afichada en comentari. Se jamai i a pas dau tot de fòto dins la ficha, ‘quò se pòt qu’una fòto botada en comentari li serve de vinheta alhors sus lo site.

Besonh d’una ajuda de mai ?

Se quauquarren aquí respon pas a la(s) question(s) que te pausavas, podes utilizar la pagina de Contacte, o alara laissar una nòta publica a l’atencion daus administrators sus lo Tablèu de Bòrd.

 

Pin It on Pinterest

Partatjar