Menut de navigacion
Catedrala Sent Peire e Sent Pau de Nantas

Catedrala Sent Peire e Sent Pau de Nantas

Catedrala gotica

  • Tipe :
  • Adreiça : 1 Rue de l'Évêché, 44000 Nantes, France

Pareis que la construccion de la catedrala de Nantas duret quasiment 500 ans…mas quò l’empescha pas de presentar una armonia d’ensemble, e li permet quitament d’afichar quauquas especificitats. Un pitit pauc mens granda que Nòstra-Dama de Paris (per exemple), li sembla tot parier, emb sas doás tors de fàcia e son estile gotic.
Mas l’interès principau de la catedrala Sent Peire e Sent Pau ven dau fach que las coijas successivas de construccion se pòden enquera observar, tant coma las ideias e maquetas pas retengudas, tanben los fondaments de bastiments mai ancians (pre-crestians din queste cas), e tots tesmonhen de las evolucions socialas e culturals que Nantas veguet pendent 5 segles. Un espaci museu amenatjat jos la catedrala, dins la cripta, permet de comprener l’istòria de l’edifici e de sa bastison, emb daus plans e daus tròçs mai ancians. Lo tresaur i es tanben conservat e expausat.

Dins son istòria, la catedrala de Nantas aget pas talament de chanças : fuguet menaçada d’esbolhament a la Revolucion, los bombardaments (americans) de 44, particularament violents e mortaus chas los civius nantes n’en peteren lo teulat, e las òbras de restauracion a lur sega eran quasiment chabats quora, per una nuech de 1972 lo fuòc prenguet per de las rasons enquera mau conegudas, e cramet tota la charpenta. Costat positiu de l’afar : la catedrala de Nantas aget drech apres tot aquò a la mai importanta operacion de restauracion per una catedrala en França, pas tot a fet chabada, e boiradís d’ancianas e de novelas tecnicas d’architectura religiosa.

Una vierja a l'enfant, element dau tresaur

Una vierja a l’enfant, element dau tresaur

Un Jesus en crotz, element dau tresaur

Un Jesus en crotz, element dau tresaur

La tomba de Frances II, darrier Duc de Bretanha, e de sa femna Margarita de Fois, se tròba dins la catedrala. Plan simbolic per los bretons e lo ratachament istoric de la Bretanha a la França apres la desfacha puei la mòrt de Frances II donc, fuguet fach far per sa filha, la famosa Anna de Bretanha, en maubre de Carrare. L’esculptor Micheu Colomb l’i faguet un trabalh d’una granda finessa, apreciat a l’espòca (segle 16), emb tot plen de detalhs dins los plecs daus vestits, dins las expressions daus personatges, dins los simbeus presents. A chasque coenh dau sarcofage, se ten una estatua, representant una « valor cardinala ». L’i trobem entau la Fòrça, la Temperància, la Justiça e la Prudéncia, qu’a una dobla chara, de jòuna filha davant e de vielh darrier, que se pòt nonmàs veire d’un certe costat, çò que dona una impression fòrta a l’ensemble.

A l’exact opausat de la tomba de Frances II au dintre de la catedrala, n’en trobem una autra, tanben en maubre, tanben en blanc e negre, tanben gardada per quatre estatuas representantas de valors cardinalas a chasque coenh : aquela de Lamoricière, generau dau Mareschau Bugeaud, lo « pacificator » de l’Algeria, responsable de la mòrt de miliers de personas… N’i a que s’en fan pas !

Lo cenotafe dau Generau de La Moricière

Lo cenotafe dau Generau de Lamoricière

Daus ostaus ancians e bien conservats se pòden enquera veire juste a costat de la catedrala, coma queu de la Psalette, a quauques mestres au Sud.

Fichas liadas

Escriure un vejaire

Vòstra adreça de messatjariá serà pas publicada. Los camps obligatòris son indicats amb *


*

Pin It on Pinterest

Partatjar