Menut de navigacion
Comarca

Comarca

La Fortalessa Obludada

  • Tipe : ,
  • Adreiça : Château de Commarque 24620 Les Eyzies-de-Tayac-Sireuil

Mon filh, n’anirem pus a Comarca
Somiar a l’entorn del vièlh castèl…

Veiqui çò que chantavan Peiraguda en 1978. A l’espòca, e mai avant, lo chasteu de Comarca es lo luec ente los sarlades van se permenar lo diumenc. Luenh de tota aglomeracion, sens rota godronada per i accedir, lo disen « perdut » mas dins lo país tot lo monde coneis quelas roinas cubertas de vegetacion, en riba de la Beuna. Tot lo monde es un pauc suspres quora lo chasteu, o puslèu çò que n’en sòbra, es tornat chaptat, en mai per un dich Hubert…de Comarca, que per un concors de circonstància se tròba esser un descendent daus senhors qu’ocupaven l’endrech.

Sas intencions son pas forçadament claras a la debuta (1972) e lo monde dau país pensen que vai « privatizar » çò qu’era un pauc, per fòrça, vengut un ben comun. Aquò serà a l’encòp validat e infirmat dins las annadas seguentas. Emb mai que mai daus fons privats, Hubert de Comarca comença tot un chantier de reabilitacion dau chasteu en 1994, e, dempuei ‘quela periòda Comarca tòrna surtir chasca annada un bocin mai de la mar verda que lo sabrondava. E pauc a pauc suerten tanben totas las estratas istoricas sus las qualas Comarca fuguet bastit.

E ‘quò remonta a luenh ! Las combas jos lo chasteu acialeren, coma quelas de tota la valada, daus òmes preistorics. I laisseren de las esculpturas e de las gravaduras, notadament un chavau, aurá considerat coma una meravilha de l’art parietau. La gròta es barrada au public, qu’es fragila e que las folhas l’i son pas chabadas, mas tot nos ven rapelar que sem dins lo « País de l’Òme », juste a costat de las Eisiás e dau Pòle Internacionau de la Preistòria…

A l’Atge Mejan, l’installacion dau chasteu es deguda a de las istòrias de curat, que los Comarca eran abats de Sarlat, donc per consequent riches. Mai qu’aquò : a l’espòca Comarca se tròba sus una rota que rejonh Montinhac a Sarlat e la tor de Comarca assegura la securitat de tots los costats…e lo contròtle, bien entendut.

Comarca era un cas notable de cò-senhorariá, per de las rasons istoricas e politicas. Los Comarca eran donc pas totjorn los proprietaris dau ben de lur nom partatjat segon daus contracts complicats de pas creire entre los Comarca, los Beinac (los mai poderós de l’espòca), los Escars, los Cendrius…au fiau de las annadas, la cò-senhorariá se redusirà aus dos prumiers. Son quelas doás linhadas que fagueren lo mai d’òbras dins lo castrum, lo mai d’extensions, jursinca au segle 16 e lur deschasença, que marquet l’abandon totau dau site. En causa tanben l’aparicion d’una novela rota per Sarlat que passa dins una valada vesina e ren la fonccion de Comarca obsoleta.

Comarca fuguet donc laissat entau, e inocupat (manca daus uns còps per de las companhiás de brigands) pendent quasiment 400 ans !

Uei, e l’avançament de las òbras fai que quasiment chasca annada lo public pòt descubrir de las novelas chausas, Comarca es un multi-site unic : gròtas preistoricas, abrics trogloditics (emb cosinas, establas e tot lo luxe que faliá), escaliers de ròcha, eschalas de còrda e garidas de peira per se garantir de las remontadas daus normands lo long de la Beuna, chapelas de peira, forn a pan, maisons privadas, domnon roman, tors goticas, e una vuda sus tota la valada mai lo chasteu d’en fàcia…

Fichas liadas

Escriure un vejaire

Vòstra adreça de messatjariá serà pas publicada. Los camps obligatòris son indicats amb *


*

Pin It on Pinterest

Partatjar