Lo bocau deu Corrent d’Uishet

Lo Corrent d’Uishet qu’es un fluvi costèir present sus las comunas de Lon, Viela-Sent Gironç e Moliets e Mar (Maransin, Gas.). Aparentat a la familha deus corrents landés, qu’es lo pendent de l’estanh de Lon e que’s gita dens la Mar grana au nivèu de la comuna de Moliets e Mar. Qu’es l’equivalent atlantic deus graus mediterranencs que trobam mes que mes en Lengadòc e en Provença (cf. Lo Grau dau Rei, Lo Grau d’Agde, etc.). Lo site deu Corrent d’Uishet qu’es rendut celèbre au començar deu sègle XXau peu Maurici Martin, « l’inventor” de la Còsta d’Argent. La reserva naturau nacionau deu Corrent d’Uishet qu’es creada en 1981 sus ua superficia de 618 ectaras. Lo nom uishet que’s pòt compréner com passatge. En gascon, lo mot que s’emplec en arquitectura entà díser obertura, atau com lo francés huis dont es l’arrevirada.

La passejada en galupa lo long de la branca d’aiga qui liga l’estanh de Lon a la Mar grana que permet de descobrir ua succession de paisatges enter marescs, torbèras e tucas, on nidan numerosas espècias animaus insuspectadas e emparadas dont 200 espècias d’ausèths, loiras, visons, pèlongs, tortugas d’estanh e un haish de peishs.

Enter tucas e pinhadar

Flòra

Que notam la preséncia d’espècias exoticas atau com Ciprès cappelats, Osmondas reiaus e los Hibiscus ròses.

Fauna

Peishs
Anguièlas e Lampreda.

Ausèths
Bernat blanc, Miscairòla, Agla pescaira, Becada, Guiraudet, Bernat pescaire, Tora, Ortolan, Esparvèr blanc, Eishauc, Hali blanc, Butòr, Cap blu, Maria camelata, Lictorna, Hauquina, Tora biardèira, Moracha, Corb marin, Gariòu, Pèlong, Guardarriu, Hali negue, Hali, Cravan, Crèc, Còthbailada, Ralle, Vigan, Malhonina, Muda.

(Los noms d’ausèths que’s pòden trobar dens l’admirable libi « Ausèths” deu Francís Bèthvéder, pareishut en çò de Per Noste / Nosauts de Bigòrra e qui’s pòt comandar en clicar ací.)

La petita Amazonia landesa

Mamifèrs

Las arribas deu Corrent d’Uishet qu’arcuelhen Cabiròus, Vison d’Euròpa,  Loiras e Sanglars.

Espècias invasivas
Los Arrats grondins que son en via d’exterminacion.